و الله عيب

السلام عليكم و رحمة الله و بركاته ، حبيت نحكي معاكم على موضوع حساس قلقني ياسر و هو
ويني قيمة الطالب الجامعي لي كانو الناس يحكيو علاها بكري ، فلان دا الباك ، فلان يقرا في الجامعة ، كانو الطالب الجامعي يشاوروا عليه بالصبع ، كي نسقسي واحد وعلاه قيمة الطالب ولات منحطة للدرجة هاذي يجاوبني بسؤال يخليني نتمنى لو أني مسقسيتوش خلاص ، يقلي " أي الجامعة فسدت " ، بصح شكون لي فسدها ، أنت راح تقول خاطي و أنا راح نقول خاطي و أي واحد راح تسقسيه راح يقول خاطي ، سبحان الله مالا كيفاه فسدت ، أنا عندي الجواب و هو أنو حنا لي فسدنا مش هي ، لأنو الجامعة لي تبنات أول مرة هي نفسها الجامعة لي نقراو فاها الآن ، و لكن لعباد هوما لتبدلوا ، أحنا لي طيحنا قيمتنا و خليناها في الحضيض ، هذه علاقات غير شرعية ، شباب و شابات يدخنون ، عادات سيئة في كل مكان ، تبرج ، كلام عيب ، عراك ، مجالس تأديب بالجملة ، و الله العظيم عيب ، عيب علينا ، زعما حنا لي تعول علينا لبلاد .
بقيلة جيت خارج من النادي و نسمع بلي منظمة طلابية مدايرة نشاط ، يعني نشاط ثقافي ، و الأهم كان شعارها " معا للرقي بالطالب " ، رحت باه نشوف لقيتهم مدايرن إنتخابات المكتب تعهم ، و الحاجة لي تبكي أنهم مدايرين حفلة في المطعم ، مش حفل ثقافي ، حفل ساخط ، فيه كل أنواع القذارة و الرقص و الإختلاط و الفتيات اللواتي صرن أرخس من براز الكلاب ، عين دمعت كي شفت رئيس المنظمة الجديدة يرقص في الحلبة و 3 فنيات دايرين بيه و يرقصوا معاه ،و الفنان القديرة خيرة و لا فلة و لا معلاباليش باسمها تغني في الديجي ، هنيئا لك فوزك بالإنتخابات ، فلقد صرت رئيس لمنظمة دعارية ، أنا منعيبش أدوما ، لأنو الكلب كي تفكلو وثاقو يوكل الناس ، أنا نلوم المسائيل تعنا لي قاعدين يسمح بحصول أمور مثل هذه ، و يوافقوا علاها بصدر رحب ، تفو عليكم لكانكم رجال ، أعذروني إخوتي و زملائي و لكن غيرتي على ديني و حبي للمحافظة على عرضي هما اللذان ينطقانني ، كرهت الجامعة ، و كرهت كل حاجة تغضب ربي ، حتى كون يجي من وراها الذهب ، خلااااااااااااااص يزينا ، عيينا خلي نرجعوا لربي ، و لي محبش و عجبوه الطرق أدوما لي في الجامعة لي معندهم ميوصلوا إلا لجهنم و تطياح لقدر و بيع الشرف و الدوس على المروءة ، أنا اسمحولي مشني مستعد باه نورط روحي ، عندي مسؤوليات و إن شاء الله ربي يوفقني باه نرعاها ... " يا مقلب القلوب ثبت قلبي على ذكرك " سلام